حوار ديال بلعاني مع الراضي (عن الملحق الساخر ليومية “المساء”)
كتبهاmohamed ، في 24 مايو 2009 الساعة: 23:08 م
- هادي تْـلاتين عام آسي عبد الواحد وانت نائب فالبرلمان، ماشي بزاّف؟
* أولا خمسة على عينيك، والله يعطيك العمى! ثانيا، بقائي في البرلمان طيلة كل هذه المدة دليل على قوتي وصلابتي وحنكتي السياسية. سير انت ترشح وشوف واش غادي توصل حتى للبرلمان. والله لا وصلتي ليه، خللي عليك تبقى فيه تْـلاتين عام بحالي أنا!
- أنا لن أصل إليه، حيت الانتخابات عندنا كايربحوها غير اصحاب الشكارة. ياك؟
* كاينة! وأنا شخصيا لا أرى عيبا في ذلك. ياك سيادنا الوالا ﮔـالو اللي ما عندو الفلوس كلامو مسّوس؟ فأين العيب إذن في أن يربح أصحاب الشكارة الانتخابات. ثم إن ميكيافيلي حسم هذا الأمر منذ قرون من الزمن عندما قال بأن الغاية تبرر الوسيلة!
- ولكن هذا يحدّ من تكافؤ الفرص آسي عبد الواحد، ولاّ لا؟
* تكافؤ الفرص عبارة لا معنى لها، ولا محلّ لها من الإعراب في الساحة السياسية عندنا. ليس من المعقول مثلا، أن أكون صاحب مال وجاه، وتأتي أنت اللي المانضة ديالك ما تسوا حتى ثمن سيور سباطي وتفوز عليا فالانتخابات. هادي شي حاجة اللي ما كايقبلهاش المنطق السياسي المغربي!
- حتى ولو كان برنامجي الانتخابي أفضل من برنامجك؟
* البرامج الانتخابية للأحزاب السياسية ليست سوى خدعة يتم اللجوء إليها إبّان الانتخابات من أجل إيهام الناس بأننا لدينا فعلا أحزابا حقيقية. هادشي علاش البرامج ديال الأحزاب كاملة كلها بحال بحال! وعلى كل حال تبقى هذه البرامج في نهاية المطاف عادة انتخابية ليس إلا. والله أوليدي يلا ما عندكش شكارة صحيحة حتى يهزّك الما!
- في نظرك، ألا ترى أن السياسي المثقف يمكن أن يهزم صاحب الشكارة؟
* مستحيل! أنظر مثلا إلى اللوائح التي تتقدم بها الأحزاب السياسية للتنافس في الانتخابات، كل الذين يوجدون على رؤوس هذه اللوائح يتشكلون من أصحاب الشكارة، أوتـﮕول واش تلقا فيها شي مزلوط واخا يكون قاري ما نعرف أشنو! يلا عندك الشكارة صحيحة تستطيع أن تتربع على رأس اللائحة، واخّا ما تكونش عارف حرف الباء واش النقطة عندو لتْـحت ولاّ الفوق!
- هل معنى هذا، وأنت وزير العدل، أن الرشوة ما تزال سائدة في الانتخابات؟
- أنا لا أؤكد ولا أنفي! لكن الناخبين على كل حال لا يمكن أن يتركوا أصحاب الشكارة ويصوتوا للمزاليط بحالك انت! المهم القضية فيها إنّ، واللي خاصك تعرف هو أنك إذا أردت أن تخوض غمار الانتخابات، أول حاجة تديرها فبالك هي أن اللي ما عندو الفلوس كلامو مسّوس!
- إلى متى سيستمرّ هذا الوضع المعوج إذن؟
* الله أعلم! لكني أستطيع أن أقول لك بأن هذا الوضع سيظل قائما ما دام أن بلدنا تفصله عن الديمقراطية الحقيقية مسافة كتلك التي تفصل ما بين الأرض والسماء! شتّي يْـلا جا باراك أوباما براسو وترشّح عندنا فشي انتخابات والله لا طفرو!
- وما السبب في غياب هذه الديمقراطية؟
* السبب طبعا يعود إلى أن القانون ديالنا حشّومي بزاف! كايْـزعم غير على الدراوش، ومللي كايلقا راسو قدّام مّالين الشكارة كايدخل سوق راسو!
- على ذكر القانون، أين وصلْـتَ في مشروع إصلاح القضاء؟
* آش غادي نـﮕول ليك، الواحد يلا بغا يدير شي حاجة ما خصّوش يزرب، حيت سيادنا الوالا ﮔـالو اللي زْرب تعطل! وﮔـالو العجلة من الشيطان، وﮔـالو اللي بغا يربح العام طويل. هذه الأمثلة كلها نضعها نصب أعيننا ونأخذها بعين الاعتبار ونحن ندخل غمار إصلاح القضاء، داكشي علاش حنا غاديين بشوية علينا، حيت بالمهل كايتكال بودنجال!
- ولكن هذه الأمثلة التي تدعو إلى التأنّي لا تصلح للمجال السياسي؟
* بلى! قد يكون ما قلته صحيحا بالنسبة للبلدان الديمقراطية، حيث كلما كان رجل السياسة مستعجلا في اتخاذ القرارات، كلما كانت حظوظه في الفوز في الاستحقاقات الانتخابية أوفر، وكلما بقي لمدة أطول في الحكم. هنا يحدث العكس تماما، كلما كنت متسعجلا، كلما كانت حظوظك في السقوط إلى الهاوية أكبر! داكشي علاش حنا خدّامين وفق المثل الذي يقول: قيس لا تغيس!
- إصلاح القضاء إذن لن يتحقق في ولايتك؟
* هادي ما فيها شكّ! يلا قدرت نصلح غير الحيوط ديال المحاكم والكراسا والبيبان ديالها ما نـﮕولها لحدّ. أنا ماشي احمق باش نمشي نجبد النحل على راسي!
- لكن من المفروض في وزير العدل أن يتسلح بقدر كبير من الشجاعة…
* الشجاعة خلليتها لْك، غير الله يربّحك بها!
- بعد عام على توليك منصب وزير العدل، بماذا تشعر؟
* والله أخويا ما نخبّيش عليك، كانحسّ بحال يلا ﮔـالس على شي مجمر عامر بالجّمر الحمرْ! يلا جيت ندير شي إصلاح ديال بصحّ كاين اللي غادي يـﮕول ليا حدّك تمّا آعبد الواحد! ويلا بقيت ﮔـالس كانتفرج المستقبل السياسي ديالي بلا شكّ غادي يمشي فالمزاح! ميمتي شكون ﮔـال لينا نشدّو هاد المجمر اللي عطانا عباس الفاسي!
- مللي القضية هاكّا دايرة، علاش قبلتو حقيبة العدل؟
* باش ما نبقاوش بلاش أصاحبي! شفنا روسنا غادي نتلاحو للتوش يلا درنا نيفنا فالسما أثناء تشكيل الحكومة، خصوصا وأن مرتبتنا في الانتخابات التشريعية لم تكن تسمح لنا بالمناورة، داكشي علاش قبلنا بللي كان!
- وفين هي المباديء آسي عبد الواحد؟
* سير قلّب عليها فالجامع! السياسة أصاحبي ما فيهاش شي حاجة سميتها المباديء. السياسة فيها غير القوالب!
- لماذا لم تف بوعدك بالاستقالة من الحكومة عقب انتخابك أمينا عاما للحزب؟
* ها حنا باقي كانهضرو. ياك عاد ﮔـلت ليك السياسة فيها غير القوالب!
- ولماذا تزامنت الوقفة الاحتجاجية التي نظمتموها أمام المجلس الاستشاري التي لم تحضرها بالمناسبة؟
* إيوا حتى انت ما تكونش مكلّخ حتى لهاد الدرجة. حاول تفهم غير بالإشارة. دابا غادي نزيد نشرح ليك باش تفهم مزيان، السياسة أولدي ما فيهاش غير القوالب، هي براسها قالب!
- هادي ستّ سنين والاتحاد شادّ وزارة العدل، علاش ما قدرتوش تفكّو الملف ديال المهدي بنبركة؟
* فكّينا بعدا الملفات ديال دابا بقا لينا غير نفكّو الملفات ديال هادي خمسين عام! ولكن آخويا الصراحة ديال الله ما كرهناش، العين بصيرة واليد قصرة. وفالحقيقة واقيلا حنا نيت اللي مقصرين فهاد القضية!
- أنت من تمّ تكليفك برفع مذكرة إصلاح الدستور، كيف كان إحساسك وقتذاك؟
* والله أخويا ما نخبّيش عليك، التبوريشة كانت شادّا فيا من الراس حتى للرجلين، وما زال ما بغاتش طّلق مني حتى لدابا!
- بالنسبة لمنكوبي فيضانات جهة الغرب التي تمثلها في البرلمان، ماذا قدّمت لهم؟
* ويلي… والله يلا نسيت ﮔـاع هاد القضية! عافا خويا يلا ما كتب فالجورنان ديالك بللي أنا ماجي عندهم من دابا واحد جوج سيمانات، بمناسبة الحملة الانتخابية، وما تنساش تـﮕول ليهم عافا خويا را السي عبد الواحد عندو ليكم بزاف ديال الوعود…
- هاد الوعود غادا تّحقق ولاّ لا؟
* انت دابا غير ﮔول ليهم هادشّي اللي ﮔلت ليك ومن بعد يحنّ الله!
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
