حوار ديال بلعاني مع عمر البحراوي (عن الملحق الساخر ليومية “المساء”)
كتبهاmohamed ، في 1 يونيو 2009 الساعة: 09:07 ص
- السي عمر، نريد في البداية أن نسمع رأيك حول فاجعة موازين؟
* آلطيييف! زعما ما بان ليك حتى شي موضوع آخر تسوّلني عليه غير هاد الفضيحة اللي وقعات فحي النهضة. أنا ما نعرف علاش انتوما الصحافيين كاتقلبو غير على المواضيع الكحلة. عافا خويا يْـلا ما بدّل عليا هاد الموضوع وشوف شي واحد آخر، ولاّ بدّل عليا ﮔـاع ساعة بأخرى وهنّيني الله يرحم ليك الوالدين!
- كاتبان بحال يْـلا مخلوع آسي عمر، مالك؟
* وكيفاش بغيتيني ما نكونش مخلوع؟ أنا شادّاني الخلعة والتبوريشة من الراس حتى للرجلين. أنا غادي نحماق. راسي غادي يتفرﮔـع. هاد الزغيبات اللي باقين فوﮒ راسي غادين يطيرو. آويلي آمّيمتي .. آويلي!
- السي عمر ياك لاباس؟
* ما لا باس والو، هاد الساعة كايبان ليا غير الباس! كايبان ليا الظلام. كايبان ليا الفشل. كاتبان ليا الخسارة. هاد المصيبة الكحلة ما لقات فين تجي حتى لدابا. الله آسيدي ربي عقلي غادي يطير!
- وما الفرق بين أن يقع ما وقع الآن أو في وقت آخر؟
* لو وقعت هذه الفضيحة قبل الآن بأشهر لهان الأمر، ولو وقعت بعد الانتخابات الجماعية القادمة لهان الأمر أيضا، أما أن تحدث في هذا الظرف بالذات، حيث لم يعد يفصلنا سوى أقل من أسبوعين عن الانتخابات، فالذي وقع ليس فاجعة لأهالي الضحايا لوحدهم، بل فاجعة كبرى بالنسبة لي أنا أيضا. أهالي الضحايا فقدوا أحبابهم، وانا بحال والو من دابا خمسطاشر يوم غادي نفقد المستقبل السياسي ديالي! عزّيني آخويا من دابا عزّيني!
- هل لك أن تشرح لنا تفاصيل ما حدث؟
* أنا لا يهمني أن أعرف كيف حدث ما حدث، ولا يهمني أن أعرف من كان السبب وراء ذلك، ما يهمني بالتحديد هو لماذا وقعت هذه الفضيحة في هذا الوقت بالتحديد. أنا الآن في وضع لا أحسد عليه. أفكر الآن في الحملة الانتخابية التي على الأبواب، كيف سأخوضها وماذا سأقول للناخبين؟ والله العظيم حتى ولليت كانحشم من راسي، دابا ما بقاش عندي وجه باش نتلاقا مع الناس. خْـفت نمشي ندقّ على عباد الله وما يحلّ ليا حدّ الباب! هادي مصيبة، هادي كارثة. هادي ما تكون غير شي فاتحة بالمقلوب خرجات فيا كود!
- باقي كاتنعس بعدا ولاّ والو؟
* حرام آخويا حرام! ﮔـاع الفنيد والسيرو ديال النعاس الي فالفرمصاينات ديال الرباط كليتو، ومع ذلك النعاس ما بقيتش كانشوفو. الأمور كانت غادا مزيان، ما كاين غير النشاط والشطيح والرديح، وكنت ديما ضاحك مع راسي، ساعة جا الموت وهجّرو ليا!
- على أي حال آسي عمر من الخطأ يتعلم الانسان، ولاّ لا؟
* آش عندي باقي ما نتعلم؟ أنا ﮔـلت ليك المستقبل السياسي ديالي مشا فالمزاح وانت كاتـﮕول ليا من الخطأ يتعلم الانسان! هاد الهضرة ما بقات كاتنفع لوالو، حيت دابا فات الفوت، وكانحس بالبرودية ديال الما جاية من تحتي!
- عن أي ماء تتحدث؟
* الما اللي غادي يهزني من دابا واحد جوج السيمانات!
- ألم تتلقّ أي دعم في هذه المحنة من طرف أحرضان؟
* أحرضان يْـلا لقاني غادي ياكلني! أنا دابا كانخاف منّو. يْـلا شفْـت غير تصويرتو كاتشدني التبوريشة، شحال من مرّة حاول يتصل بيا فالتلفون ولكن ما كانجاوبوش. كانو معوّلين عليا باش نحمّر الوجه للحزب ديالنا ساعة كحّلت ليهم الضواصا!
- علاش اللي ما تحرْْكش حتى انت لشي حزب؟
* حنا فالمغرب الناس ما كايصوتوش على الأحزاب وإنما على الأشخاص، دابا عمر البحرواي فين مّا مشا الفضيحة ديال حي النهضة غادي تبقا لاصقة فيه! واخا نشمي حتى لجزر الواق واق. وزايدون حتى حزب ما غاديش يقبل بيا، الي كانخاف منّو دابا هو أن أخرضتن بحال والو غادي يصيفتني للتوش!
- يقدر يديرها زعما؟
* وعلاش اللي ما يقدرش، هو ما صعيبة عليه حتى حاجة، بحال والو غادي يْضحّي بيا من أجل المصلحة العليا للحزب! يسحاب ليك صعيب يديرها؟ هو را عندو كلشي بحال السلام عليكم!
- أفهم من كلامك أنك تعترف ضمنيا بتحمل مجلس مدينة الرباط الذي تترأسه مسؤولية ما جرى. أليس كذلك؟
* علاه فين عمّرك شفتي شي مسؤول فهاد البلاد كايعتارف بالأخطاء ديالو باش نعتارف بها أنا؟ آسيدي اللي مسؤولين على ديك الكارثة هوما هادوك اللي مشاو ليها برجليهم، هوما اللي بغاو يموتوا. وانتوما بغيتو تورطوني. أنا بالله وبالشرع معاكم!
- ولكن الملعب الذي أقيمت فيه السهرة لم يكن يتوفر على أجهزة الأمن والسلامة، وهي مهمة ملقاة على عاتقكم. كيف تردّ؟
* آسيدي راه البشر عندنا اللي ما مربيْنش. هم الذين يلقون بأنفسهم إلى التهلكة، هم الذين جعلوا السياج الحديدي ينهار، وديك الحفرة اللي كانت فالتيران ما لهم ما كانوش كايشوفو باش يطيحو فيها؟ إيوا اللي بغا يلوح راسو لاارواس يلوحو، ولها يـﮕلبو!
- ألا تخشى أن تزيد هذه التصريحات النارية التي تطلقها في تأزيم وضعيتك أكثر؟
* وضعيتي وصل تأزّمها الآن إلى أقصى حدّ. أنا ﮔـلت ليك قريب نقرا الفاتحة على المستقبل السياسي ديالي، أنا كانشوف الخسارة جاية ليا مكسيرْية بميّة وعشرين فالساعة. حمارتي ما نايضة ما نايضة اللهم نزيد نكمّل لباباها داكشّي اللي بْقا ليها، واللي ليها ليها!
- في نظرك، ما سبب أعمال العنف والشغب التي تصدر عن الجمهور الذي يأتي من هوامش العاصمة لمشاهدة الحفلات؟
* هادوك الناس آسيدي فيهم الحسد الله ستر! مللي كايطلعو للرباط وكايشوفو الأحياء الراقية والـﭭيلات والقصور فين كانعيشو حنا، كايـﮕولو علاش هادو عايشين فالنعيم وحنا عايشين فالجحيم. داكشي علاش كايبداو التهراس فالـﭭيترينات والزّاج ديال الطوموبيلات وكايـﮕلبو فالبركاصات، زعما باش يقلزو لينا من تحت الجلاّبة! شفتي آخويا شحال محسادين هاد الناس!
- لو كنت مكان هؤلاء، هل ستصدر عنك نفس التصرفات؟
* أنا لا يمكنيي حتى أن أتخيل أن أصير في يوم من الأيام من سكان الهامش. أنا من الناس ديال الهاي كلاص، كانشوف غير القدّام، وما عمّري شي نهار غادي نفكر نرجع مارشاريير! هادي ما عمّرها غادي توقع!
- معنى هذا أن علاقتك بمواطني الهامش مقطعة بالمرة؟
* بحال هكّاك! مرّة مرّة كانشوفهم فالتلـﭭزيون، ولكنني لا ألتقي بهم إلا مرة واحدة كل خمس أو ستّ سنوات!
- أي أثناء الحملات الانتخابية؟
* بالضبط! ﮔـول ليا آخويا بعدا، شحال دايرة ماطيشة والبيض هاد ليّام فالسوق؟
- علاش؟
* باش يْـلا كان الثمن ديالها طايح نضبّر على شي كاصْك باش نحمي راسي!
- زعما الناس غادي يرشقوك بالبيض وماطيشة؟
* وعلاه باقي عندك فيها شكّ؟! يلا كان غير البيض وماطيشة لاباس، صعيب غير يوجّدو ليا شي شْرجْمات ديال الحجر!
- ختاما بغينا نعرفو آشناهي أكبر أمنية عندك فهاد اللحظات العصيبة آسي عمر؟
* أمنيتي الكبرى هي أن يصاب سكان الدائرة التي سأترشح فيها بفقدان الذاكرة لوقت قصير، باش مْخاخهم تفورماطا، كي ينسوا تلك الفضيحة التي وقعت يوم السبت الماضي. هذه هي أمنيتي الوحيدة، ويلا ما تحققاتش أخويا بلا شك غادي يهزّني الما!
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
يونيو 3rd, 2009 at 3 يونيو 2009 6:27 ص
شكرا أخي على المقالة.. تستحق كل التقدير
مع تحياتي, عصام
منتديات غياهب الموت
يونيو 5th, 2009 at 5 يونيو 2009 7:14 ص
ابتسمت لانني كتبت في نفس الموضوع لكن بطريقة أخرى فأنا بعيدة عن المغرب ولا أعرف كل تلك الوجوه التي تعرفها أخ الراجي..
تحيتي