وحق الله العظيم الى بعض الشعوب عندهم الزهر تبارك الله مقاد بحال السكة ديال التران ، وشي وحدين أخرين الزهر ديالهوم معوج بحال المنجل !

الشعب الفنزويلي مثلا ، وهبه الله رجلا عظيما اسمه هوكو تشافيز ، أول شيء فعله عندما وصل الى الرئاسة هو نزع الأراضي الفلاحية الشاسعة التي نهبها الناهبون في عهد رؤساء فينزويلا السابقين بدون وجه حق ، وأعاد توزيعها على الفلاحين الصغار ، مما خلف ارتياحا كبيرا جدا في صفوف الشعب .

هادشي راه وقع في دولة فينزويلا ، ودابا أجو نشوفو كيف تتعامل الدولة المغربية مع الأراضي الفلاحية العمومية بدكالة وسوس وغيرها من المناطق الخصبة .

عندما نذكر الأراضي الفلاحية ، تتبادر الى أذهاننا مباشرة تلك الفضيحة العظيمة التي وقعت قبل عامين عندما قام وزير الفلاحة محند العنصر بتوزيع مئات الهكتارات من أراضي " صوديا وصوجيطا " التي تركها الاستعمار على زملائه في الحكومة ، وأصدقائه البرلمانيين ورجال الأعمال . غير المحجوب أحرضان الأمين العام ديال الحركة الشعبية بوحدو خدا شي 300 هكتار في اقليم والماس بالشمال !

وماشي غير السياسيين اللي كايستافدو من أراضي الدولة الفلاحية ظلما وعدوانا ، حتى هشام الكروج سبق للملك أن أهداه مساحة أرضية شاسعة جدا في اقليم بركان ، باش يدير فيها الليمون . كلشي عندنا في المغرب مخلط ، ما بقيناش عارفين شكون هو الفلاح ولا الرياضي ولا السياسي ولا سيدي زكري !

الكروج خانز فلوس وباقي كايزيدوه ، في الوقت لذي ما تزال فيه آلاف مؤلفة من المواطنين المساكين يسكنون في البراريك والمراحيض والاسطبلات ، هذا ما يسمى زيادة الشحم في ظهر المعلوف .

الكروج عطاوه فيرما على قدها لأنه رفع راية المغرب في كثير من الملتقيات الرياضية لعالمية ، وفعلا فهذا الشاب النحيف يستحق كل الدعم والتشجيع ، لكن كان عليهوم يعطوه غير شي كاضو صغير ، بحال شي وسام ديال الفضة ولا حتى ديال الذهب . وايلي الفيرما ؟…هادشي بزاف أصاحبي !

مثلا اللاعب السويسري روجي فيديرير هو أيضا شرف سويسرا ورفع رايتها عاليا في ملاعب التنس العالمية أكثر مما رفع الكروج راية المغرب في ميادين ألعاب القوى ، سويسرا لم تعط لابنها المدلل فيرما شاسعة كما فعل المغرب مع الكروج ، وانما أهدته بقرة من النوع الكروازي ! الى باعها يالاه يالاه يشد فيها شي جوج دالمليون أولا قل . عرفتو علاش ؟ حيت سويسرا ريال الى خرج من الصندوق ديال الدولة خاص الشعب يعرف فين مشا ، بينما الخزينة العامة للملكة المغربية بحالها بحال الطنجرة ديال شي خيرية ، اللي جاب شي مغراف يغرف .

وباش نختمو هاد الموضوع اللي كايطلع فعلا الطونسيو وكايطير النعاس ، لابد من التذكير بأن مسيو ادريس جطو بدوره ذاق حلاوة أراضي الدولة هذه الأيام ، حيث استفاد من هبة ملكية عبارة عن سبعة مليارات من السنتيم ، وسبعة هكتارات من الأراضي في مدينة مراكش ، التي وصل فيها ثمن المتر المربع الى أربعة ملايين ستنيم .

يارب تدير لينا شي تاويل ديال الخير ، هادو را غادي يقتلونا بالفقصة !